噚日香港仔地王以57.1億銀天價成交，最開心嘅，除咗係投到地嘅呂志和、黃志祥同陳廷驊，仲有一班香港仔業主。不過，有人歡喜有人𤓓！賣地場上，至𤓓嘅應該係長實（001）執行董事吳佳慶。

雞啄唔斷搞出事

話說競投第二幅長沙地皮時，當叫價去到3.58億嗰陣，長實可能唔係好志在呢塊地，加上負責投地嘅吳佳慶唔知係咪冇乜細藝，所以不斷同隔離嘅老闆李澤鉅、同事何廣毅傾偈。嗱，賣地場上就冇明文規定話唔准同隔籬位咬耳仔嘅，之不過，喺公開場合高談闊論就唔係幾好囉。
唔知係咪因為咁，所以坐喺吳佳慶隔籬、揸住個15號牌嘅長實高級經理何廣毅，同吳佳慶傾偈時，特登用個牌遮住，點知唔遮猶自可，一遮大家𤓓！
眉精眼企、一眼關七嘅拍賣官以為佢舉牌承價，可能因為個牌舉到唔高又唔低咁，醒目嘅拍賣官先至唔整句「多謝15號牌嘅朋友」畀佢嘆，不過就當場問：「你哋係唔係出價呀？」吳佳慶同何廣毅嗱嗱聲SayNo，扮晒矮仔耍手兼擰頭，認真𤓓爆！
𤓓爆嘅吳佳慶經一事仲未長一智噃，似乎仲係未傾夠，之後繼續同小超人李澤鉅咬耳仔，真係唔知佢嚟投地，定嚟傾偈。

扮晒矮仔耍晒手

嗱，小學生都知上堂掛住傾偈，除咗自己聽唔到書，仲影響埋老師講書；唔知吳小姐細個時，係咪都咁鍾意傾偈呢呵！
電郵：mailto:[email protected]