當年今日
關於我們

【返嚟打救港劇】尊容=人民幣?王祖藍:賺得呢啲錢,就預咗人哋咁話你

蘋果日報 2017/09/28 00:02

無綫王祖藍TVB人民幣老表愛國

王祖藍近年密密上大陸主持節目狂吸人仔,又喺網上發表愛國言論,但亦遭到唔少網民抨擊、唾罵。
被指愛國、搵人仔,是好是壞?
王祖藍咁解釋:「已經習慣咗被標籤,我個樣等於 (一邊做人民幣符號)人民幣吖嘛!其實我又覺得唔係一個好大問題,蔡康永話『你做得呢行,賺得呢啲錢,就要預咗人哋咁樣話你』。」
【底薪$4,800:我以前都攞過綜援】
王祖藍承認大陸市場大,收入當然提高。「初初喺TVB主持兒童節目,底薪得$4,800,因為兒童節目係一至五都有,爆騷咪大約萬幾二萬蚊人工囉。但返大陸拍《百變大咖秀》,一集已經係幾個月人工。」
短短五年,王祖藍由窮小子搖身變成億萬富翁,豪宅買完一間又一間,早前一擲1.14億買入大埔複式豪宅連泳池,又同邵氏合作喺大陸開工作室,單係觀塘個office已經2,400呎,旗下擁有近20位藝人,真係幾威威。
「我以前都攞過綜援,2000年爸爸發病,02年走咗,但我03年先畢業(演藝學院),咁我阿媽每朝都會落茶餐廳做幾個鐘兼職,晏晝買餸,夜晚返屋企煮飯。因為細佬妹仲細,雖然嗰時最困難,但反而係我最堅強嘅時候。】
【見到港劇唔爭氣,就好想返嚟】
「0依家你變咗好似好一帆風順嘅時候,其實係你最苦惱嘅時候呀,因為人際關係、精神壓力嗰種折磨。以前你可能真係三餐飽足已經開心到飛起喇。你有錢大家會話,去邊度旅行呀,屋企人都會嗌交;以前冇錢,大家捱騾仔咁樣,日日喺屋企冇交嗌嘅,哈。」
既然已經名成利就,點解仲要返香港開公司同拍大台劇?王祖藍直言係一種情意結:「我自己係睇燦哥(廖偉雄)同鵬哥(盧海鵬)大,唔係睇佢哋,我點會突然之間對扮嘢產生興趣,而成為咗今日嘅我呢?!有陣時見到有啲港劇,或者香港節目唔爭氣,就好想返嚟。」
【《老表》第三輯避談中港矛盾】
《老表》系列播到第三輯——《老表,畢業喇!》,王祖藍繼續參與故事創作及召集演員。上兩輯都講到中港矛盾,但今次就要小心啲避開,王祖藍亦直認不諱:「所以講教育,就希望真係諗番未來係點樣樣,即係唔好再鬧交啦。」王祖藍同老婆李亞男都有計劃生小朋友,對於未來小朋友喺邊度讀書都好頭痕,佢就提出一個咁嘅疑問:「究竟喺唔喺香港生呀?真係咁差咩?喂…我都喺香港讀書出嚟嗰喎。」

王祖藍好認同金像編劇、今次擔任《老表》編審嘅龍文康,喺劇中寫嘅一句說話:「教育唔係睇今日,教育應該係睇二十年之後。」回想當年嘅自己,喺band 1學校成績最差嘅一個,未能原校升學,當時嘅中文老師就帶佢去學配音,讓他有一技傍身:「因為呢位老師,我就寫咗第一集,郭晉安派DSE成績表俾學生之餘,仲每人派一張卡片,介紹一份工畀佢哋。安仔(郭晉安)就係唔在意DSE係點,只在乎學生將來係點,但係今時今日,仲有幾多呢啲老師?!」
採訪:嵐山、懷鈺
編審:懷鈺
攝錄:Andrew、Jackal
攝影:沈健程
剪接:Jackal

髮型:Ted Yeung
化妝:K.T. Tsui
服裝:SON OF A KING
造型:Dicky Lee
empty
攝影:沈健程
empty
不時喺網上發表愛國言論,佢自言已被標籤。(網上圖片)
empty
做兒童節目時得4800蚊月薪,拍呢個大陸綜藝節目一集已經有幾倍人工。(網上圖片)
empty
之後祖男越做越旺,《跑男》個身價已經幾十級跳,o依家估計佢身家逾兩億。 (網上圖片)
empty
對香港電視圈有情誼結,因為睇鵬哥同燦哥大。(資料圖片)
empty
金像編劇龍文康(圖右)為《老表》執筆,因為會為大家帶嚟共鳴。(資料圖片)
empty
《老表》1劇照,不過今次冇萬綺雯喇。(資料圖片)
empty
「我自己係睇燦哥(廖偉雄)同鵬哥(盧海鵬)大,唔係睇佢哋,我點會突然之間對扮嘢產生興趣,而成為咗今日嘅我呢?」
empty
「已經習慣咗被標籤,我個樣等於 (一邊做人民幣符號)人民幣吖嘛!」