新股好耐都無試過咁熱鬧喇！年底前至少仲有40至50隻新股趕住上市，投資者推介會開到去文華東方、灣仔君悅呢啲咁冷門嘅酒店，仲有「明燈」光大銀行又嚟翻兜，仲唔係大凶兆？雖然大量「餓鬼」出閘搶食，但佢哋基本上都無乜賣點，只有信達（1359）一隻熱爆。芬佬話，信達當日連開3個ballroom，開足27圍，但仍然人滿為患，大量投資者冇位坐，迫到企喺後面食三文治，連banker都無飯食呀！
1999年，國務院為解決當年國有銀行嘅爛賬問題，成立四大「官方收數佬」，信達就係其中之一。通常呢啲因政策出現嘅企業，完成歷史任務後就消聲匿跡，但信達卻越做越大，𠵱家仲提供埋金融產品，幫公司搞重組，收吓服務費之類。到底佢係點樣「化爛賬為盈利」？大部份投資者都睇唔明佢盤數。大家只係睇中佢有基礎投資者接咗一半貨，供求緊張；加上信達阿媽係財政部，未來仲有另一間「收數佬」華融會嚟上市，所以在情在理，信達今次一定要搞得好好睇睇。

回歸基本面，呢一類公司適唔適合上市？處理壞賬要好多「專才」，係賺係蝕波動好大，如果經濟開始向下，條爛數價值、收返嘅可能性都會跟住大幅下降。睇返招股書，信達今年上半年，因資產價值下跌而產生的撥備虧損，就按年勁升260%去到34.76億人仔，最大筆係衰在中鋁集團相關資產身上。跟風嘅同時，大家應該要留意吓。

海廸

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange