講述有關腦退化症嘅電影《幸運是我》嘅演員惠英紅（小紅）、陳家樂及導演羅耀輝，今日去到鳳德邨一間老人院探訪。惠英紅喺戲中飾演腦退化症病患者，今次為齣戲，小紅要每日花兩個鐘為頭髮畫上銀色，又要撈上芝麻糊，真係每日收工洗頭都洗到頭皮甩。

56歲嘅小紅，稱母親本身都有腦退化症，佢話擔心自己都會有遺傳，小紅謂:「我驚自己都有機會有，有可能有遺傳，細佬0依家過咗50歲都有少少，正常人過咗50歲，個腦都會縮少少，有退化。我喺7月會做會身檢查照吓個腦，雖然每年都會做全身檢查，但係近年開始避開，唔係好想知。」

小紅話有了解過一啲研究報告，多學自己唔熟悉嘅事物，可以幫助活動平時冇用嘅腦部份，小紅話:「唔用就會退化，我0依家都有學佛教經文，學另一樣嘢之餘，同時為媽咪念經，我哋兄弟姊妹都有做功課。」

陳家樂今次於戲中飾演MK仔，要漂染金色頭髮，因頭皮敏感被漂傷，邊拍戲邊甩頭皮。家樂為拍一場喊戲，有一日要喊足6個鐘，佢話:「全靠小紅姐搞喊我，之後佢都安慰番我。」