韓國天團BIGBANG嘅29歲成員T.O.P，上周被爆喺寓所吸食大麻，日前因服食過量藥物而昏迷，留院ICU四日，噚日終於離開ICU病房，轉到其他醫院繼續接受治療，而轉院因為有單人房方便T.O.P治療外，亦方便佢接受精神方面嘅治療。

而喺噚日播出嘅綜藝節目《演藝家中介》中，節目邀得醫生談及T.O.P情況，據節目所講T.O.P服食咗一種有鎮靜作用兼抗焦慮嘅Benzodiazepine(苯二氮䓬類)安眠藥，早前醫院方面亦指喺T.O.P尿液中亦發現對呢種藥呈陽性反應，《演藝家中介》邀得嘅醫生就指呢種藥係舒緩精神性有關嘅情緒，嚴重嘅病人先會食兩粒，但今次睇T.O.P嘅反應，估計佢食咗20粒以上先會有咁嘅反應。