當年今日

有好學生則靈 - 左丁山

蘋果日報 2002/02/02 00:00


名校搞直資,目的當然係為咗爭取質優學生。大家唔好以為付得起錢交學費就係質優學生呀,屋企有錢,家庭教養好,當然係一個充分條件,但讀書嘅唔係家長,而係子女,子女唔努力讀書,亦係徒然。譬如一啲美國加拿大留學生,屋企愈有錢畀佢哋使,外間引誘力愈大,買架靚車周圍蒲,愈多男女關係愈過癮,讀書就好難咯;反而一啲手頭緊,銀紙似夠又唔多夠嘅學生,讀書反而更加專心。
又叻又勤力嘅精英學生,好多都入咗馬鞍山一間世界級名校讀,讀完就操兵入英美著名大學,科大恨收佢哋恨到口水流。呢日到馬會飲茶,見到老同學帶個女嚟食飯,一傾之下,真係肅然起敬,老同學位千金係呢間名校學生,個樣子又甜又士嘜,將來必然係一個人才。
世姪女行開之後,老同學好坦白咁講:「名校之所以出名,未必真係學校管理好,學生教得好,最緊要嘅其實係學生好。阿女間學校啲學生,個個都係千挑萬選,考試成績與課外活動(如體育、音樂、藝術)都係一流頂;但據我觀察所得,其他就真係麻麻啫,唔係咁巴閉,學校成績好,主要係學生夠醒之故。」唔怪得聖保羅男女要搞直資,取回收生主動權,馬鞍山名校咁出名,學生質素高係最大因素。
魔術師話無氈無扇,神仙難變,名校如果冇優質學生,亦會平庸。假如哈佛收晒香港啲Band5生,你睇吓哈佛會唔會重係咁醒。