(新增回應)

雷頌德(Mark)、李純恩同李楚洳，三人以畫家身份，喺葵興舉行聯合藝術展「Fantasia」，方毓仁擔任主禮嘉賓，方力申有去捧場。

近日盛傳黎明(Leon)同女助手Wing譜「父女戀」，點知今日更有周刊影到Wing肚凸凸，疑懷胎6個月(新聞連結： http://bit.ly/2IntNhr )，黎明好友Mark成為追訪對象。

講到Leon係唔係做爸爸，Mark直言：「唔好話我守口如瓶，我真係唔知，你哋問番Leon。」至於Leon係唔係同Wing拍拖，Mark稱真係唔知：「我真係唔知，我係識Wing，有一齊合作過，佢以前有負責李治廷、Janice同JW，不過最近冇見。」咁係唔係Leon公司現時所有事情係由Wing打骰，Mark再講：「我真係唔知，近排冇見Leon，佢喺大陸拍緊嘢。」

若果Leon做爸爸，會唔會覺得驚訝？Mark淡然咁話：「如果係真嘅，唔會驚訝！邊個朋友都會恭喜。」之後Mark耍手擰頭稱Leon唔鍾意朋友喺出面聽完啲嘢再問番，以免被Leon話佢八卦，所以佢都唔敢打俾Leon了解同恭喜。

Mark除咗分享Leon嘅事，佢今日主要係分享自己嘅畫作，現場展出咗13幅畫，有12幅都係畫佢屋企有關嘅人同物件，Mark話：「細個學過畫畫，這批是四年前嘅畫作，冇特別計劃開個人畫展，因為自己冇乜時間畫畫，屋企得十幾幅嘅畫作。」另外，Mark稱畫畫係興趣，並冇商業成份，又指唔會強迫小朋友畫畫，除非佢哋自己鍾意。

此外，同場嘅方力申本身都係藝術品收藏家，屋企有個百件藝術品，小方話：「李純恩因為想投資畫作，所以同爸爸熟絡，o依家李純恩可以買賣投資畫作養家，我就未得，因為投資都有升升跌跌，藝術品要鍾意先至最重要，賺當然係開心，但要教育大家去欣賞藝術品。」

此外袁詠儀同張智霖夫婦今晚到灣仔出席活動時，被問及可知黎明做爸爸一事，佢哋反問:「 係咪真架，邊個做爸爸都高興，不過未證實唔敢回應囉。」

精選娛聞，喺晒《娛果》
http://fb.com/appledailyent