日本富士電視台去年夏天播出嘅日劇《晝顏》，雖然平均收視13.9%都唔算話好高，但係就話題性十足，因為套劇講寂寞主婦出軌，而且都有啲大膽鏡頭，喺日本成為咗熱話，主演嘅齋藤工仲突然爆紅，做咗新師奶殺手。據日本報章《東京SPORTS》指，富士台正計劃拍攝《晝顏》續集，先會喺今年底播出特備劇，明年再播連續劇。

上年套《晝顏》女主角係上戶彩加吉瀨美智子，而上戶彩今年8月尾先至做咗人阿媽，唔會咁快再拍劇，所以就會換角，換邊個？就係今年剛剛閃電下嫁山本耕史嚇親大家嘅堀北真希！

該報指富士有意搵堀北，因為佢都已經係人妻，而且相信亦夠話題性，至於吉瀨美智子個角色，就會由廣末涼子取代，同樣具話題性。男角會保留齋藤工，可能會加入山田孝之等。不過，要集齊呢啲演員都唔易喎。