【6點半體場●一周人語】鄭曉為「唯一」出路 香港花劍冠軍靠防守爭入東奧
蘋果日報 2019/12/13 18:30
港隊劍擊東京奧運鄭曉為花劍一周人語6點半體場
香港劍壇人才輩出，女子花劍手鄭曉為2017年在香港中文大學畢業後下定決心轉為全職運動員，現時正為東京奧運入場券全力打併。她笑言轉全職打劍的心態大為不同：「打劍變咗係我唯一要做嘅嘢、唯一嘅路，當我輸緊嘅時候冇得諗藉口，要諗辦法去改善自己嘅缺點。」
在2010年廣州亞運中，當時年僅15歲的鄭曉為夥拍張顥瓊、劉曉為和連寶香等師姐在女子花劍團體賽摘銅而回。不過這面獎牌未有令鄭曉為下定決心轉成全職運動員，她在協恩中學畢業後升讀中大的文化及宗教研究系，直至2017年畢業才發現放不下劍擊，終決定踏上全職之路，「其實我打劍就打咗好多年，但係之前讀大學時要兼顧學業，唔係好投入咁打。不過畢業時發現自己鍾意打劍，我都唔想放低呢件事，所以就轉全職。」
轉全職之後，鄭曉為專注練劍，技術和體能方面有顯著提升，亦令她無悔轉全職：「我不嬲出名體能廢，啱啱轉全職時跟得好辛苦，之前打香港公開賽可能入咗四強就好攰，但今日打完都覺得還可以。」此外，當劍擊不僅是興趣，更是其事業，令她更有決心爭取佳績：「之前冇乜決心，一直覺得『試吓打，打唔到我就做其他嘢』，但而家劍擊變咗係我唯一要做嘅嘢。」
今年連奪挑戰盃和香港公開賽冠軍的鄭曉為，笑言花劍新教練Gregory Koenig不時鼓勵自己，令她自信大增。鄭曉為現時世界排名66（21.750分），跟排51（31分）的張楚瑩在兩個只能活一個的情況下爭取代表香港出戰亞洲區外圍賽的資格，繼而跟亞洲列強爭東京奧運入場券。她表示自己的風格以防守為主，希望能冷靜應付餘下六個計分賽，爭取更多分數：「我同佢（張楚瑩）嘅分差話多唔多，話少唔少，所以都有啲壓力。希望嚟緊積分賽都打得好啲，每一個比賽都好重要，唔可以鬆懈。」
記者：許嘉明
鄭曉為（左二）在協恩中學畢業後升讀中大的文化及宗教研究系，直至2017年畢業才發現放不下劍擊。
鄭曉為（左）今年連奪挑戰盃和香港公開賽冠軍。
她笑言轉全職打劍的心態大為不同：「打劍變咗係我唯一要做嘅嘢、唯一嘅路。」
鄭曉為（中）現時正為東京奧運入場券全力打併。
轉全職之後，鄭曉為專注練劍，技術和體能方面有顯著提升，亦令她無悔轉全職。