蔡約翰做硬今季冠軍練馬師，關注點只係佢可唔可以贏多過91場賽事，從而刷新由告東尼保持的香港練馬師單季最佳成績。

阿蔡正在向呢個目標挺進，當佢今日（11日）於第六場三班田草1200米爆冷勝出「駿明珍寶」後，馬房累積連贏七個賽日，季內已獲88Win，破紀錄可謂指日可待。

四歲馬「駿明珍寶」今季大躍進贏到開巷，之前已先後勝出泥地1200、谷草1000及谷草1200米各一次，呢鋪於1200米打開埋田草勝門，沿途守第三位，直路加速小勝對手頸位而回，馬兒田、谷、泥地贏勻晒，兼是不同路程，成為這天繼「特獎」後另一匹季內四捷馬，今場單Win及組合獨贏A3分別派223.5及69.5元。

有人快樂有人愁，「駿明珍寶」因祈普敦受傷退陣，臨時改由其澳洲同鄉潘頓策騎出賽。結果潘頓冷手執個熱煎堆，可收約7萬元騎師獎金，連同第四場贏大熱門蘇偉賢馬房「特獎」，潘頓個人一熱一冷Win起孖。相反祈普敦眼白白冇咗場頭馬，仲要禮拜三（14日）晚谷草跑唔跑得暫時都未知。

第六場二至四名順序為「財高八斗」、「馬功臣」及「極速前進」，四重彩派一萬幾，三T正獎有中正，每注派超過150萬元。