美國流行天后Britney Spears賭城騷發生意外，美國時間周三晚，佢如常於拉斯維加斯開騷時，一名狂迷突然衝上台，嚇到Britney腳軟跪低！

當時Britney正演唱緊《(You Drive Me) Crazy》，突然見到後面有個男人爬上台，初時Britney都唔為意，直到有歌迷叫佢小心，佢就即刻擰轉頭望，同時幾個保鑣立即衝上台保護Britney。Britney問：「冇事嘛？睇睇有冇事？」突然佢嚇到腳軟跪一跪低問：「佢有槍？」之後立即被保鑣帶落台。

另一邊廂，37歲嘅狂迷Jess Webb都被保安人員同舞蹈員合力制服，但佢反抗仲踢保安人員。據知佢於台下時已行為不檢，之後仲衝上台。保安人員將佢制服後報警，身上並無發現任何武器。