名模琦琦最近同萬希泉合作，設計咗以「童話之森」為主題嘅陀飛輪腕錶，今日萬希泉創辦人沈慧林（William）、太子鐘錶老闆鄧鉅明、任達華、琦琦一班好姊妹馬詩慧、歐陽妙芝、姚書軼等齊集金鐘撐好友。

華哥最近忙於拍戲周圍飛，笑言插針幾小時都要飛返港撐老婆，華哥話：「今次好豪，本身訂咗11隻，o依家買夠18隻，屋企親戚多，第一批已經賣晒，o依家等第二批，手上呢隻係老婆送嘅，個心會360度轉，裏面有小鹿，代表快樂。」琦琦話：「拍拖時華哥成日送我鍾意嘅小鹿畀我，今次設計華哥都有畀意見，佢好鍾意大自然，戴住隻錶代表好愛自己家庭，最緊要開心。」

提到才女林燕妮離世，任達華不敢相信話：「吖，點解冇消息？佢寫好多小說，因為霑叔關係，我哋見過幾次，佢好有才華，覺得好可惜，佢係天才作家，咁有才華咁叻女，真係可惜，好唔開心。」

另外，William透露今次合作籌備咗成年，同時好感激琦琦對香港品牌支時，對佢同團隊都好鼓舞，鄧生就笑言自己同太太都係屬兔，係女人都鍾意咁夢幻嘅設計，太太都已經買咗一隻，提到父親節，鄧生話：「等我老婆送份我鍾意嘅禮物畀我，不過係我張信用咭埋單，唔緊要，最重要係開心。」而William父親節前會同鄧太去雲南開會，父親節會趕返香港慶祝，佢話：「今年係我第二年父親節，囡囡已經識叫爸爸，又識扶住行，好開心同期待。」

精選娛聞，喺晒《娛果》
http://fb.com/appledailyent