一個人俾蜜蜂針到，少不免皮膚會紅腫，甚至有少數人會對蜂毒產生過敏反應，若果情況嚴重，當事人可能因此休克喪命。

英國著名騎師韓立勤日前於卡萊爾馬場，遇上一宗被蜂針的不幸事故，搞到左手腫過豬頭之餘，佢更全身出現斑點，真係睇見都覺得恐怖。

事緣韓立勤於剛周一（18日）贏出個人當日第二場勝仗後，除下手腕裝備後發現成隻左手腫晒，完全不能緊握拳頭。韓立勤形容自己當時左手好似一個小型足球咁大，甚至有一刻覺得自己會暈低。

駐場醫護人員檢查過後，發現佢當時係俾黃蜂針到，而當佢除低全身裝備時，醫護人員亦發現佢全身出現過敏反應，即時幫佢注射血清解毒。

雖然其後個人情況穩定落嚟，但韓立勤返到屋企之後，病情卻又再度惡化，最後佢要去醫院服食抗生素解決今次問題。

韓立勤事後話完全感覺唔到有黃蜂螫過自己，呢類事件亦係第一次於自己身上發生，感到相當可怕。韓立勤現時已經康復，昨天（20日）亦有策騎出賽。

圖片來源：racingpost