當年今日
關於我們

【韓流】Tao又傳退團!粉絲揶揄:內地唔會有人捧

蘋果日報 2015/04/16 06:00

蘋果內地香港粉絲韓國即時揶揄鹿晗EXOKris退團laytao

韓國男團EXO上年「大地震」,兩名中國籍人氣主將Kris同鹿晗先後退團,淨低其餘兩個中國籍成員Lay同Tao留低幫EXO打江山。

不過,喺呢幾個月,內地就先後傳出消息話Tao亦有打算離團回鄉拍戲,雖然EXO嘅所屬公司SM事務所已經否認過,但近日正當EXO以十人姿態進行緊回歸演出時,內地最大視頻網站愛奇藝又再爆出得到確定消息,話TAO已經認咗同SM解約,令EXO再次陷入成員離團嘅危機。

有消息指SM方面對於Tao離團一事今日就發表聲明話:「對於出現有關報導EXO成員Tao解約一事實屬謠傳,毫無根據同並非事實。」而Tao方面亦未有作出回應。不過,粉絲方面就表現得好激動,有人指責愛奇藝話:「挑撥離間」、「確定是可靠消息,韓國都冇報道,你邊得嚟呢個消息」等。

亦有粉絲揶揄Tao話佢當年喺Kris同鹿晗退團時曾經話過人哋反骨,點知自己o依家又有樣學樣,仲話佢:「佢唔係話鐘意韓國O架咩,做咩同SM解約要嚟中國發展!估我去到內地都唔會有人捧你。」