水貨客傾巢而出買清藥房同超市奶粉，唔少受歡迎牌子奶粉一罐難求，但水貨客唔只買晒奶粉，就連農曆新年嘅糖果禮盒都唔放過，其中一個目標係有搞超級市場嘅教協。教協喺鬥爭中成長，當然有計仔趕絕水貨客啦！其實教協已經拿拿臨出招，以限購嘅形式，嚴防水貨客狂搶朱古力、果仁同埋曲奇餅。

確保會員入到貨

八方聽聞，有水貨客眼見教協超市嘅貨品價廉物美，偷偷借教協會員個證，假冒會員入去大量入貨。教協都好驚本地真會員買唔到，最近喺最受歡迎嘅禮品旁邊貼咗張「限購告示」，列明藍罐曲奇、Mauna Loa夏威夷果仁，一個會員證最多只能買6盒，金莎朱古力就只能買12盒。
據銅鑼灣超市嘅收銀員話呀，呢個告示近一、兩星期先貼出，源於近日懷疑有水貨客大量入貨，而旺角教協更係重災區；為確保會員有貨，所以限制一個人唔可以買太多。其實教協一早規定，各款奶粉，憑會員證每日只可買5罐。
教協副會長張文光就話，由於有會員證就可以喺教協買嘢，唔排除有水貨客喺教協大量入貨圖利，佢笑中有淚話喎，可能早前有傳媒比較各大超市嘅新年禮盒價格，教協被指「平通街」，因此成為水貨客埋手對象。教協現有9萬會員，張文光話首要保證人人上到嚟都入到貨，所以先提出限購，唔想教協會員兩手空空失望而回呀。

mailto:[email protected]