韓國女子組合SISTAR今晚喺九展，舉行首個香港個人演唱會，晚上八點十分，四名成員身穿閃令令超貼身迷你連身裝，性感登場，當中以昭宥打扮最為性感，騷胸露腰又晒長腿，不過佢跳舞時成日掛住抽衫以防走光，有啲分心喎。

出名性感嘅SISTAR以《GiveItToMe》同出道歌《PushPush》打頭陣，唱《PushPush》時，四位成員更對住觀眾搖籮，全場high爆。之後又以廣東話同粉絲打招呼同大講「我愛你」，超級識做。

MC環節四名成員分別同大家推介去韓國必遊嘅景點，昭宥推介三清洞，多順推介去仁寺洞，孝琳提議大家可以去韓國嘅古宮博物館學歷史，反而寶拉就叫大家去電視台。咁又係嘅，0依家個個去韓國追星，分分鐘喺電視台嘅時間多過去明洞。

除咗唱SISTAR嘅歌之外，昭宥都唱左一少段之前同鄭基高合唱嘅hit歌《Some》。粉絲當然都有起哄要孝琳唱《再見》，但孝琳話之前喺記招唱過，今次唱冰雪奇緣嘅《LetItGo》，粉絲照單全收。