上兩個月華華先講過，大陸得番一隻紅底股，就係剩低上海掛牌嘅貴州茅台單天保至尊。估唔到兩個月後，貴州茅台亦喺金融海嘯巨浪下慘遭淹沒，上個禮拜五，股價跌穿100蚊人仔，收報97.89蚊。亦即係話大陸紅底股抗戰失敗，終於全告淪陷。
全球股災爆發前，內地股市全盛期一度有超過10隻紅底股，貴州茅台作為內地基金愛股，股價屢創新高，不知幾咁風光，去年尾及今年1月初曾經兩度急升至230蚊人仔。可惜花無百日紅，全球大冧市，大陸股市亦受重創，茅台股價先後失守兩百同百五蚊關口，上個禮拜五最終失守100蚊，年初至今股價累積插水近六成。
至於港股方面，雖然仲有一隻手數得晒嘅5隻紅底股，包括重磅藍籌滙控（005）、恒生（011）、永隆（096）、渣打（2888）同埋宏利（945），不過相信唔使好耐，紅底股就會篩剩3隻。家吓滙控同恒生兩父子股價跌至百零蚊，只係掹車邊，美國或歐洲是但爆單壞消息，佢哋就隨時紅底不保。

滙控恒生危危乎

滙控同恒生兩父子近排真係黑氣纏身，老竇滙控上月9號俾大摩追魂索命，發表「戰略研究報告」，預言滙控未來60日跑輸大市，結果滙控股價每況愈下，加埋金融海嘯衝擊，股價個半月下跌15%至105.2蚊。阿仔恒生又唔生性，投資失誤，可能要為投資華盛頓互惠銀行嘅債券作出大筆撥備，消息引發市場恐慌，股價短短1個月插水50蚊，跌至106蚊。唔通黑開真係有條路？

　

香港紅底股

‧宏利（945）　股價*：179.1元　今年高位：317.6元　今年變幅：-43.6%
‧永隆（096）　股價*：155.7元　今年高位：156.0元　今年變幅：+63.0%
‧渣打（2888）　股價*：140.0元　今年高位：291.0元　今年變幅：-51.7%
‧恒生（011）　股價*：106.0元　今年高位：168.0元　今年變幅：-34.1%
‧滙控（005）　股價*：105.2元　今年高位：137.2元　今年變幅：-20.1%
*上周五收市
資料來源：彭博資訊

李華華
mailto:[email protected]