近日有幾單樓市的消息筆者特別留心，一是財爺曾俊華話政府不會對樓市泡沫坐視不理，有需要時會再出招；二是地產代理紛紛叫苦，話今次政府的辣招將會導致不少從業員失業。瑞銀發表報告，擔心若樓市步入下跌周期，政府又未撤銷特別印花稅，樓價有大瀉之虞。
筆者亦有同感，以港府做事的風格及速度，收唔切的機會都幾大，因為港府係唔鬧得，只有當她意識到個問題夠大，才會採取行動，如果樓市唔跌得多，又點會覺得個問題大呢？所以要政府收番個額外印花稅，睇怕要等樓市大跌，最弊係現時都趕走晒啲炒家，到時想重召佢哋托住個價，真係睬你都儍。

累及用家孭罵名

士佳認為政府這次實在是出錯招，因為講辣招，最辣一招已出，再辣便會損害樓市健康。其實政府就算要加印花稅，亦應該分段出，最好由限時限量改為不限時不限量，例如可以先出口術試試水溫，等四五日後，當大家以為唔會加時突然加5%，以後大家就會計住計住，因為樓市一升大家就會怕加稅，這樣既可在高位凍結升勢，亦唔會影響用家。
現時買樓，就好似買咗二等樓，萬一兩年內想換樓或有急事要套現，除非層樓升到兩成，否則都要預蝕住走。最好可以令到市場疑神疑鬼，估唔到你幾時出招，炒家有顧慮，再進取都有個限度。而且亦可以令大眾有種感覺，係樓市逼我出招，免孭打垮樓市的罪名。若然再設下機制，如樓市下跌幾多%，印花稅便會自動下調，就可以將樓市變回市場調節，唔使再俾人鬧干預市場，影響市場秩序啦。

張士佳
寶來證券（香港）董事　投資服務部
mailto:[email protected]