澳門求才若渴，唔少賭場、酒店都嚟香港挖角，過檔澳門嘅包括旅發局前市場推廣總經理何陳美虹，佢去咗澳門威尼斯人度假村，做旅遊市場發展高級副總裁。上任大約半年，佢噚日同去咗澳門參加香港旅行社35周年海外會議嘅八方講，已經搵埋屋，叠埋心水做住澳門人先。佢仲話，度假村真係好大，要花時間適應（八方數過，由辦公室去到酒吧，足足1,007步）。
由於度假村超大，八方噚日登記入住亦差啲蕩失路。何太話，知道啲人客未必好熟路，所以開幕之時，就贈送指南針畀入住嘉賓，因為酒店房分為南北兩翼，搞錯就要行好遠，有指南針會方便好多。
香港寸金尺土，睇怕都唔使出動指南針咁嘅贈品。