「世上無難事，只怕有有心『仁』！」呢個係陳奐仁被人喺網上瘋狂洗版嘅總結。

42歲嘅陳奐仁，喺99年俾張學友睇中，由新加坡嚟咗香港發展，佢除咗身兼作曲家、填詞人、歌手、唱片監製、混音師、伴唱、歌唱評判、主持、演員等等等等多到數唔晒嘅身份之外，仲有佢嘅圓碌碌身型都令人留有深印象。

日前Hanjin 喺fb咗一段短片，見到佢喺健身房上身赤裸咁玩戰繩，成件事嘅亮點就係佢身上嘅線條同腹肌，完全想像唔到呢個就係Hanjin，連佢自己都寫道：「Recognise me?（認得我嗎？）」，結果有唔少網民喺網上討論呢件事，連杜汶澤話：「我的新偶像大隻仁，用了十個月時間改變自己，嗰種恆心同毅力，令人動容！今年夏天！做一樣八歲之後從來無做過嘅事！我要用最fit嘅身形，去沙灘！曬太陽！」阿澤仲話：「只許成功、不許失敗！因為失敗嘅藉口可以有一萬個，成功嘅原因只有一個，咪就係勁囉⋯⋯做唔到，我去死！」Hanjin之後都有回覆：「我慎重諗咗幾個鐘之後。。。#約定 #you+me #今個夏天最fit身型去矖太陽！」

Hanjin話想借自己鼓勵其他人，人人都有希望，噚日Hanjin同埋教練Lawrence喺鰂魚涌接受訪問，結果梗係令人眼前一亮，以前肥嘟嘟嘅陳奐仁真係換咗人，身形細咗一個碼，一身肥膏變咗做肌肉，而且仲操得好分明，睇見佢同Lawrence好合拍咁利用一個180磅重嘅車呔做運動，引體上升同掌上壓統統冇難度，Hanjin果然冇「揸流灘」！

講到網民嘅讚賞，Hanjin話：「我當然覺得好開心，好似得到好多鼓勵，嗰條片要多謝攝影師同導演，即係我嘅教練Lawrence！」唔經唔覺Hanjin都已經肥咗20年，佢一直都冇為意自己有幾肥，直到一次身體檢查，醫生話佢嘅內臟脂肪太多，好容易有心臟同肝藏問題，Hanjin覺得自己係時候去令自己身體健康，萬一問題出現咗，似乎已經太遲！

查實仲有另一個講法，話說Hanjin去為一個歌唱比賽做評判，偏偏得佢一個坐爛咗凳，結果搞到現場啲人笑唔停，佢就笑笑口話：「嗰陣係我自己笑自己啫，不過唔可以排除呢啲小鼓勵，但係主要原因唔係張凳，而係張宣傳相，個個評判都好瘦，得我一個係好肥，所以我咪諗吓係咪要換吓人。」

Hanjin喺舊年8月初開始接受訓練，最初Lawrence都抱住半信半疑嘅態度，覺得Hanjin可能係三分鐘熱度，結果令Lawrence大感意外，忍唔住讚Hanjin係一個好學生：「佢真係好勤力，而且每一樣嘢都會問到足，有問題仲會whatsapp俾我，佢初初一下引體上升都做唔到，但係o依家可以做到10下，真係好大進步。」

一直以嚟，外界覺得Hanjin嘅音樂好好，但係佢話自己只不過係勤力，自己嘅目標唔係咁清晰，唔係係咗攞獎，唔係為咗紅，只係為咗做好音樂，所以咪一直都默默耕耘，每日都做一啲，正如做運動一樣，Hanjin話：「其實我唔需要一個明確嘅目標，要求自己著乜嘢衫，只係希望自己健康，解決瞓覺同關節嘅問題，Lawrence都教我按步就班。」

唔知Hanjin嘅老婆又會唔會為佢有呢個轉變而開心呢？Hanjin話：「我o依家瞓覺冇晒鼻鼾，又肯瞓覺，佢咪怨我少啲囉，雖然我已經肥咗20年，都唔會有人話我點解咁放任自己，但係我諗今次我會繼續keep落去，會好有恒心咁繼續落去！」

採訪：何慧斯
攝影：葉君海、馮嘉銘
場地提供：TRIFitness HK

精選娛聞，喺晒《娛果》
http://fb.com/appledailyent