12年「民選冠軍」朱千雪，當年因無綫「甩碌」失落冠軍寶座，不過觀眾緣屬極佳嘅千雪BB，同年夥回巢嘅吳啓華，拍處女作《On Call 36小時II》，初試啼聲已經快速入屋。

到舊年嘅《EU超時任務》，朱千雪已經成功擔正做女一。事業起步快人一步，不過千雪BB前年年尾毅然暫別幕前，同無綫請假1年修讀中文大學企業傳播社會科學系碩士學位。舊年再接住修讀香港城大學法律博士學位。

又要忙讀書考試，又要出活動賺外快，千雪BB日前就話每日瞓得兩個鐘，唔好講拍拖，連對象都仲未有……（新聞連結： http://bit.ly/2ngx6vn )

28歲都冇拖拍，好dry吓喎？不過日前就有讀者爆料，指千雪BB其實好多人追o架，唔少家底仲好猛料o忝，同佢行得最埋嘅一個，英文名叫Justin Ng，讀者話Justin喺澳洲讀醫科，爸爸5年前係香格里拉集團做執行董事，o依家就係老牌茶莊「祺棧茶行」嘅老闆。讀者話千雪BB同Justin交往始於5年前，又質疑身為基督徒嘅千雪BB，隱瞞同Justin嘅親密關係。

《蘋果》睇番千雪BB個Facebook，發現喺佢朋友名單中，除咗有Justin外，原來仲有add埋Justin爸爸同細佬，睇嚟關係都真係好密切喎。

據消息指，Justin只係千雪BB眾多追求者嘅其中一個，喺澳洲讀醫嘅Justin，即使分隔兩地，都同千雪BB亦一直密密保持聯絡。不過o依家忙緊考試嘅千雪BB，根本就冇時間拍拖，睇嚟Justin想奪女神芳心，要長情又要夠耐性先得！