今集《衝上雲霄II》，最精采係兩位男角:一個係萌爆但年紀唔細嘅馬國明，一個，係完全演活失去至愛、連對方離開前一刻，都要孤伶伶咁走……那份罪疚與哀痛，吳鎮宇演來淒楚動人……是的，男人的眼淚，也可以令人無限淒酸。

先講啲開心嘢，就係馬國明俾Head姐情挑一幕。係嘅係嘅，完全明白知道，江美儀喺現實中只係大過馬明BB三年，但畫面上俾人嘅「不安」感覺，非關年齡事，而係大家仲好記得《名媛望族》呢個劇，江美儀係黑絲儀，而黑絲儀，喺劇中係馬國明阿媽。

今集一開始，Head姐(或者黑絲儀)主動同馬明破冰，叫對方唔好再避自己，仲請咗對方返屋企坐。男主人鄧梓峰仲喺英國，估唔到馬國明都夠膽入去。孤男寡女共處一室，男仔實有損失!結果，Head姐由房出嚟，手上，就多咗件戰衣。

當時嘅情景，感覺真係非常之令人O嘴。一室幽暗、古舊燈光令人不期然諗起《名媛》中黑絲儀點樣引「郎」——劉松仁入室情挑，依家，劉松仁變成劇中佢個仔馬國明，而負責「挑」起欲望嘅仍然係江美儀。似乎係編審想考驗江美儀。

畫面係，馬明一見到，即展示佢嘅金牌O嘴，然後，
黑絲儀拎住件戰衣，步步進逼:「襯唔襯我呀？」
一臉驚惶嘅黑明拉緊自己件外套，嚴防被撕…開件衫，口窒窒咁話:「阿Head姐，你突然攞件戰衣出嚟，我好難控制自己唔亂諗嘢喎。」
黑絲儀再進一歲:「咁你諗緊乜嘢？」
馬明再縮，想偷走:「我諗起我真係有啲嘢要買……」
呢個時候，黑絲儀報以水汪汪嘅眼神，馬明就話:「Head姐，你唔係真係對我有非份之想呀嘛？」
黑絲儀再埋身:「咁你有冇，唔？」

嘩，救命!
呢場所謂情挑戲，只係黑絲儀解釋番墾丁當日，馬明喺隔籮房都聽到黑絲儀同鄧梓峰間房張床「劇烈地動了起來」嘅原因……原來唔係床戰，只係兩人準備「埋位」時忽然明白情已逝，所以冇做到。巴斯光年就係咁un張床調和氣氛，引到黑絲儀現出high到震嘅樣……係真係成個人震晒嗰隻。

就係咁之嘛。