中環在線:中聯石化「晒」資歷為攞錢 - 李華華

蘋果日報 2011/06/12 00:00


中聯石化(346)引入內地延長石油做大股東後,中聯石化主席卓澤凡話,延長雖然喺內地油公司中只係排第四,但早喺滿清宣統年間成立,老過晒中國石油、中國石化同中國海洋石油咁多位大佬。當年全國第一口井喺陝北(即延安附近)發現同開採,就係延長操刀。
自從中央接手延長之後,保留成為內地唯一地方政府石油公司,家喺內地仲有幾百個加氣站,又有石化提煉廠,甚至全國性保險公司、銀行。
家陣延長入股中聯石化,將來會借助中聯搞國際化,涉足上、下游生意。另外,前管理層許智明起身後,中聯石化喺馬達加斯加嘅油田,逐步落實生產計劃,期望兩年後可以正式投產,估計開檔生產前要使5億美金。講咁多都係想話你知,嚟緊佢哋會想法子融資。