多年職場生涯，記憶中見過三位同事喺office「做到喊」（真係流眼淚）。以下為大概經過及分享，亦從中歸納出員工「做到喊」嘅三大原因：

一、壓力大到喊

當時正值OT月份，夜晚10點幾，仍然有幾位marketing同事喺office埋頭苦幹。

「Mandy，你幫我做埋呢份proposal，聽朝交畀我。」阿姐拎住手袋，行埋去同Mandy講。

Mandy當時不發一言，直至阿姐離開office，Mandy就開始喺位度飲泣。

「嗚嗚嗚，咁多樣，我邊做得晒啫。嗚嗚，仲話要聽朝交，咁即係叫我今晚喺度瞓啫。」Mandy一路喊，一路對住個電腦講。其他同事聽到之後，都紛紛上前安慰。

壓力太大的確好容易令人崩潰，尤其係當嗰位同事喺工作上搵唔到出路，上司又唔體諒，仲要百上加斤，情緒就好容易失控。

作為上司，應該好好觀察下屬嘅工作情緒、留意平日放工時間等，從而做好適當工作分配；而作為下屬，如果真係到咗工作承受能力嘅臨界點，亦好應該同上司開心見誠，唔好等到自己真係「做到喊」先出聲。


二、委屈到喊

阿寶嘅上司喺公司出名縮骨，有福佢享，有禍就下屬當。有一次，上司喺大老細面前將自己嘅過錯賴落阿寶身上，輾轉間被阿寶發現。阿寶深深不忿，走入上司房，同上司理論。

房間內嘅對話內容只有佢哋兩人先知，但結果係阿寶喊住咁喺上司房度行返出嚟。

職場上遇到嘅人「千奇百趣」，為私利而損害別人嘅上司、同事比比皆是。如果發覺真係遭人陷害、被迫食死貓或遇到一啲極不合理嘅對待，第一時間記得唔好衝動，因為始作俑者多數都早有準備，未必會即刻承認過錯。你可以先向自己信任嘅同事蒐集更多證據同徵詢意見，然後再決定下一步。

如果始作俑者不幸地係自己上司（正如阿寶嘅故事），咁我會建議先針對事件，向上司多問一啲開放式問題（open-ended question），令你更了解事件之餘，亦希望令佢露出更多破綻，從而有利之後嘅討論（或對質）。

三、是非煩到喊

Andrew同剛入職嘅teammate傳緋聞，佢哋嘅一舉一動都成為大家茶餘飯後嘅話題（包括前後腳出入公司、一齊去食兩個鐘頭lunch、經常咁啱同一日sick leave等）。由於兩人都聲稱各自有男女朋友，令緋聞更有話題性，一眾同事討論得愈來愈熱烈。

有一日lunch time，幾個同事又喺pantry度竊竊私語，但不幸嘅係，嗰班同事講得太忘我，連Andrew入咗pantry佢哋都唔知。

「你哋會唔會講得太過份呀？大家同事一場，有需要用啲咁核突嘅字去形容我哋咩？我男仔唔緊要呀，人哋女仔仲使見人嘅？下？」Andrew一下子喺pantry爆發，嚇到所有人措手不及。佢呢段說話非常有威力，而且眼泛淚光，言語間仲帶有幾分萬梓良嘅感覺。

有人嘅地方就有是非，當自己不幸成為是非嘅主角，嘗試以平常心對待之餘，亦可以一招「以進為退」應對，例如以自嘲形式，同佢哋一齊講自己是非，咁做可以顯出你大方之外，亦有可能令「是非精」知難而退。面對公司是非，「認真便輸了」。

人在職場，「可以笑的話，不會哭」，但如果真係控制唔到，喺office流下眼淚亦唔係咩大件事。只要好好記得自己因為咩事而喊，將自己變得更強壯，令每一滴眼淚都有價值就可以了。


專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/

探索驚奇精彩的 wONdEr 故事，請LIKE 我們的Facebook Page，並設定為「搶先看」： https://www.facebook.com/wondermedia.hk/