再傳北韓將進行第2次核試，美股一於懶理，照創新高，美國政府消息更指北韓核試可能係「流嘢」虛張聲勢，只係普通炸彈，並非核彈，補多句，就算係核試，第一次核試其實係失敗告終。北韓核試係咪假嘅外人好難知，但係美國政府消息睇嚟又唔係好真，冇證據兼主觀成份好重。不過，政治就係咁，好難知道真相，大家都係叠埋心水睇住啲真嘢嚟炒個市。
真嘢係啲乜？就係曾特首份施政報告冇料到，唔會對港股有影響，另外就係油組話減產，阻擋唔住油價下跌，好簡單，如果你係石油輸出國，明知油價已進入大跌浪，你會唔會真係減產咁笨？要知道，過多一段時間，𠵱家沽出嘅油，睇番轉頭，原來好高價，於是乎，減產係唔想啲油價跌得咁快，爭取沽油嘅時間，而唔係真正相信減產可以托高油價。

中石化C輪4997：中石化（386）對上兩個禮拜下試支持位，10日及20日線先後失守，不過50日線嘅支持力好強，喺條線上面橫行咗幾日，昨日終於有動作，升番上10日線樓上，突破咗條短線下降阻力軌，隨機指數向上突破，睇嚟會再試5元，破咗位睇5.4元。
隻中石化C輪4997昨日報收42.5仙，成交好活躍，仲有51日期限，溢價1.98%，槓桿10.6倍（有效8.7倍），引伸波幅29.1%，對沖值0.77，正股升上5元，4997應該有近兩成半升幅，正股去到5.4元，4997應該會喺90仙樓上，呢個價買，正股跌穿4.7元沽出止蝕。
俊　樺