鬥車變拳賽？大帽山荃錦公路彎多路窄，不少車手會視為挑戰場合，不過前日就有一名私家車司機同一名電單車車手因鬥車變鬥氣，結果演變成武鬥，雙雙被捕。
讀者鄧先生的車Cam片直擊整個事發經過，時間發生喺前日下晝近5點左右，當時車前有兩架私家車同兩架電單車，一齊沿大帽山荃錦公路去八鄉落緊山，其間排喺第二嘅私家車想爬頭，所以駛近最前面架電單車，鐵騎士下意識彈開，當兩車駛到荃錦公路同林錦公路同錦上路交界迴旋處之後，鐵騎士即場大爆發，演變成一場格鬥。

被私家車男女阻截離開

當時鐵騎士落車先向司機不斷喝罵，再施展連環拳打向車窗內嘅司機位置，繼而連環踢向車門，鐵騎手仲想開車門，好彩佢最終未能得逞，就遷怒右側鏡，一拳打爆洩憤。鐵騎士之後上車打算離開嗰陣，私家車男司機同女乘客立即落車追，阻截對方離開，其間男司機不斷摸向嘴角位置，似被鐵騎士連環拳打中受傷。
當時鐵騎士怒氣未消，佢落車後再拳毆司機頭部，女乘客見狀衝前阻止，又用手機拍低佢正面相，後方另一名鐵騎士見狀立即充當和事老勸開雙方，鄧先生未幾就超前離開，未知兩名司機結果係點。
警方回應，前日下晝5點，42歲姓范男子同44歲姓陳男子，分別駕駛電單車同私家車沿荃錦公路鬥車，互有超前至近英雄亭對開，私家車突駛近電單車，令范擦損手部，電單車手柄亦告損漽，兩車停埋一邊，范隨即拳打私家車倒後鏡，再毆傷陳口部，而姓陳司機就向對方箍頸及踢腳，警方調查後分別以公眾地方打架及刑事漽壞拘捕兩人，當中范報稱受傷，送往博愛醫院敷治，陳拒絕送院。