黃心穎今日去到荔枝角出席活動，心穎話原先擔心聖誕節使唔使開工，點知冇通告，又冇人約，問到佢今年係咪第1年同馬國明過聖誕，心穎諗咗好耐，佢話：「真係唔記得舊年聖誕做啲咩，應該係一班人一齊過，應該有佢喺度。」心穎話今年應該係二人世界，不過佢哋聖誕節係去睇劉德華演唱會，心穎笑言：「有第三者，就係劉德華。」

馬國明早前喺《深宮計》慶功攞咗過萬蚊出嚟抽獎，馬國明話老婆本都攞埋出嚟，心穎笑言：「老婆本關唔關我事都未知，佢有儲埋好多錢，我唔相信佢得咁少，佢嘅財政我唔知，我哋好多嘢都係獨立，俾自由空間大家。」

心穎話已經買咗禮物畀馬國明，係一啲唔實用嘅嘢，心穎話：「因為實用嘅嘢佢都有，我就想收啲唔實用嘅嘢，鍾意收聖誕卡，禮物相信佢唔會唔送。」對於求婚戒指算係實用定唔實用，心穎話：「太突然，唔想聖誕節收呢啲，情人節都唔好，最好喺普通嘅日子先送。」

精選娛聞，喺晒《娛果》
http://fb.com/appledailyent