大律師公會每年都會舉行Bar Mess，宴請公會成員聚首一堂，可以話係法律界嘅年度盛事。上周五就係2018年度嘅Bar Mess，當然都係出席者眾，但大狀向八方報料，現場人士所見，好似少咗一啲熟悉嘅面孔。邊啲人未見現身呢？咦，又會咁啱嘅，據聞未有見影嘅知名大狀，好多都來自年年都「哂馬」出席嘅Temple Chambers，即係邊啲？計有前大律師公會主席石永泰、譚允芝同湯家驊，全部都係支持林定國連任，但林最終敗放戴啟思手上。

過往每間律師樓收到公會邀請後，都會再send email俾律師樓內大狀，提醒佢哋一定要出席呢個法律界年度盛事；有大狀話喎，之後界內都有消息流傳話唔少大狀會因為公會之前嘅選舉而「杯葛」今次活動，咁啱又真係好多知名大狀缺席喎。而過去時任律政司司長都會出席，但今年新司長鄭若驊都係影都無。

到底係因為「小器」，未放得低選舉恩怨而缺席，抑或撞正新春期間，確實有多人唔在港或唔得閒？八方都無從稽考，報料人則話好好地一個Bar Mess搞成咁，真係What a mess喎！