當年今日
關於我們

杜汶澤寸爆馬逢國「入鄉隨俗」論

蘋果日報 2013/03/09 06:00

杜汶澤

社運人士楊匡噚日去到內地探劉曉波妻子劉霞,一如既往唔會咁輕易探得到,亦一如以往有班不知名人士出嚟打人,連香港記者都唔放過。

噚晚維權人士胡佳更喺twitter話楊匡畀公安捉走,到依家下落不明。香港呢邊,特區政府例牌話「十分關注」,但咩行動都冇。不過最搞笑係前立法會議員、全國人大代表馬逢國,接受訪問時話,訪問敏感題材嗰陣,香港記者要「入鄉隨俗」喎。人哋拳頭都出埋,仲可以有人咁理性「包容」同「入鄉隨俗」,點解強國人嚟香港又唔「入鄉隨俗」呢?

呢排好旺嘅杜汶澤又出手,講個故仔大家聽: 「香港記者北京被公安打,馬逢國話香港記者去大陸採訪,要入鄉隨俗!我聽聞内地有啲地方,結婚時做新娘嘅姐妹團要俾新郎哥嘅兄弟團搞,咁萬一有香港人上去做姐妹,又使唔使入鄉除褲呢?」 哇,好不安呀!