【身份惹猜測】被誤傳係細So白滑KOL阿B 「熊仔頭」女神Bie親回：完全唔熟
蘋果日報 2020/09/02 20:37
細SO杜小喬林呈風熊仔頭
【新增回應】
41歲商台前DJ細So(蘇耀宗)昨日被《蘋果》爆他自拍裸照情挑白滑KOL阿B，背妻偷食「罪證」曝光，網民對阿B的身份大感興趣，個個偵探上身追查「白滑KOL阿B」的身份，今日有人在細So的道歉post聲稱阿B的身份是一個叫林呈風（Bie）的女仔，有網民隨即在Bie的IG留言：「阿b姐，係咪即係你自己報料比傳媒架？我唔係幫細so，但你自己都有預謀架啦。」「經一事蔡一智。下次唔好咁蠢啦！」
翻查資料，發現Bie原來曾經在YouTube頻道「熊仔頭」做過「熊仔頭」女神，早前在大台劇集《解決師》中飾演學生，亦拍過不少廣告和網上短片，同時她亦擔任地產代理。《蘋果》今日向Bie了解，她說：「喔，同事主完全唔熟，我諗你哋搞錯咗了，麻煩查清楚事實先。」Bie亦有在IG的限時動態留言：「撐《蘋果》是因為欣賞你勇於報道真相，呈現事實，讓讀者可以自行批判思考，希望可以一直下去。你猜......今天對我惡言相向口不擇言的人，你們明天會為你昨天的言論而道歉嗎？」
其後又有網民指曾在細So租用作炮房的葵涌iPLACE見過杜小喬，《蘋果》向杜小喬了解，她指因為熊仔頭之前的工作室在iPLACE：「一大班人上過去熊仔頭工作室，但我冇去過佢嘅地方，唔知佢有工作室喺度，亦冇喺嗰個地方見過佢。」她指認識細So是因為對方曾做月餅生意，上年中秋送了月餅給她，「我同佢唔熟，之前喺商台有見過佢，但冇乜特別聯絡，冇食過飯。」對於細So背妻偷食，杜小喬說：「希望我同男友可以長長久久。」
自從細So爆出背妻偷食白滑KOL阿B後，細So回覆《蘋果》承認背妻出軌，向老婆連講7次對唔住，表示以後會做一個好丈夫、好爸爸，而太太陳頴楠（阿Wing）則表示選擇相信，並肩繼續這段旅程，她表示多謝大家給予空間和體諒，讓他們一起經歷、一起成長，他們會好起來的。與此同時，網民迅即翻細So的舊賬，稱這個「壞咗嘅人」並非首次出軌，有人猜測細So對叫阿Wing的女仔情有獨鍾，旋即鎖定第三者「白滑KOL阿B」應該都是叫阿Wing，接着在細So的IG搜查有個「Wing」字的女仔，稱27歲圈中人車泳希就是「阿B」，《蘋果》昨晚曾聯絡車泳希經理人，他甫聽到蘋果記者，對方即刻回答：「我唔得閒。」立即cut線，事後車泳希在IG動態留言澄清：「多謝咁多位網友和記者的關心，我同男友關係好好，你哋所講嘅人唔係我啊！」
本來一直以輕鬆對答回應網民的Bie，由於網民覺得其答案太模稜兩可，故引來網民瘋狂洗版，有網民更留言表示：「支持你阿b，搞散人屋企人好平常，愛係無錯嘅。」令Bie最終於IG Story出post澄清自己非白滑KOL阿B，她更有感而發，tag下該網民表示：「希望各位衝出來的人，不要不負責任地留個言罵完就走。他朝水落石出之時，記緊來還我一個清白，可以嗎？」雖然已經出post澄清，但網民嫌Bie早前的回應太過含糊，故繼續留言追擊，不勝其煩的Bie出長文表示：「香港人求公義，大家氣憤難平，連人哋家事都想抱不平要緝兇我明白，但請別忘記要求真。」Bie指可以接受大家盲猜盲估，因為「撞名」關係，所以覺得網民猜測都是合理懷疑，不過當大家盲信一些無確實證據的指控時，就令她接受不了，Bie續說：「究竟是大眾判斷能力集體下降，定社會習慣咗原告變被告、屈打成招的風氣？」Bie又指在此事中令她最失望的，不是被人指罵：「係我見到你咁講之後，我終於明白點解我哋一行出街就畀人話非法集結，有咩動作就係暴動。」之後她更打上「我話你有罪你就係有罪」、「我睇唔到」、「我唔知」、「你有咩同個官講」的hashtag。及後Bie作出最後一個回應，表示自己並不認識細So，又指本來自己也是抱着「清者先清」的想法，但沒想到網民會如此一面倒，故她希望能為大眾上一課：「首先凡事要fact check！呢種心力，不如一齊放落一個牽涉大眾利益嘅社會議題上，相信可以發揮好大力量！」她又指知道「誰是阿B」這個謎團有機會一世也解不開，但她也希望大家別因為一個英文字母，而將人屈打成招：「你都唔好因為一個英文字母就屈到真嘅一樣咁啦，講就講咗，再要鬧都冇辦法。」並打上「欲加之罪何患無辭」的hashtag。
Bie發長文表示不滿。（IG圖片）
Bie 終於企出來澄清自己並非白滑KOL阿B。（IG圖片）
Bie曾經拍過大台劇《解決師》。（網上圖片）
Bie做過「熊仔頭」女神。（影片截圖）
有網民去了Bie的IG留言。（IG截圖）
對於被指是阿B，Bie亦有在IG限時動態留言表達不滿。（IG截圖）
杜小喬表示沒有在葵涌iPLACE見過細So。（網上圖片）
杜小喬曾經去過睇細So演出的舞台劇。（FB圖片）
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！