【抗武肺】King斥林鄭「禁酒令」沒政治智慧 Pam：睇唔到意義喺邊
蘋果日報 2020/03/25 15:45
林鄭月娥禁酒令趙勁皓Pam鍾達茵
武漢肺炎肆虐，港府以佛系防疫，口岸猶如無掩雞籠，醫護無奈發起罷工迫使林鄭月娥封關，令香港醫療系統避免崩潰危機，卻換來秋後算賬，一眾港人咬緊牙關捱貴罩自救，最終得到世衞讚揚，林鄭即率領高官開記招自戴光環，自誇由她領導的特區政府在抗疫上做出成績，但每次香港再有新確診個案出現，港府的抗疫政策均舉棋不定。
近日有個案是確診者到中環蘭桂坊，並交叉感染親密接觸者「播毒」，林鄭開記招卻放風指「實施禁酒令」，主要防大家酒後有親密接觸，對賣酒的食肆帶來打擊，老蘭即有多間知名夜場宣佈停業，業界均稱政府事前沒諮詢或通知。
在觀塘跟友人經營酒吧餐廳的和音歌手鍾達茵（Pam），今日回覆《蘋果》時說：「如果真係實行，對於有酒牌食肆餐廳係有影響，酒水利潤比例幾高，如果我哋唔畀賣酒，都有汽水賣，唔飲酒咪叫食客嚟飲汽水，冇咗最好嘅利潤，呢個可能係自私諗法。但巿民而家同心抗疫，我哋餐廳都做好多防疫措施，我哋而家會check食客有冇戴手帶，確保冇手帶先可以入座，而家又話唔畀賣酒，我哋又要解決政府出嘅問題，唔係佢畀解決方法幫我哋抗疫，呢啲政策令我哋好無奈，如禁酒令係有意思，我哋會實行去做，但睇唔到意義喺邊。」
假如政府硬推政策，Pam的酒吧餐廳會有甚麼對策？她續說：「其實向來都唔係好理嗰個 （問題製造者），我哋一向都係自發性去抗疫，知道呢兩星期會係高峯期，我哋已經將訂枱人數上限為6人（如果你8個人就要分兩張枱坐），預備咗幾款自取8成熟外賣畀嚟食飯嘅客人，等佢哋嗰晚食完飯，可以帶啲食材返屋企食兩三日都得，自己整唔係翻熱比較健康。」
趙勁皓（King）也在尖沙嘴經營酒吧，惡疫擴散已影響生意，若然再來辣招「禁酒令」，當然雪上加霜，他今日接受訪問時說：「政府係完全冇政治智慧，咁做根本對抗疫冇幫助，一早應封關，佢話派手帶畀人又監察唔好，啲人返嚟又周圍走。若然禁酒令可以抗疫，為全港巿民，我哋一定支持，但我好多part time員工中午份工都冇咗，我哋晚上做唔到生意，員工點生活。暫時我哋都見步行步，唔cut員工糧，公司支援部份part time員工，用停工時間做公司內部嘅工程，加射燈洗冷氣、維修等，條例通過咗會完全停業，唔會偷偷哋開。」
King續說昨天有開會，並向協會反映問題：「希望同政府講我哋嘅犧牲，係希望你全面封城，我哋停業係為咗抗疫，你不斷輸入大陸人又好，回流華人又好，係會令件事沒完沒了，我哋只係白白犧牲。」
和音歌手鍾達茵指「禁酒令」，對有酒牌食肆餐廳係有影響，因為酒水利潤比例幾高。（資料圖片）
她又指看不到林鄭的「禁酒令」有何意義。（資料圖片）
趙勁皓直言酒吧生意難做，員工點生活。（資料圖片）