科網股近期大熱，財經版經常被阿里巴巴創辦人馬雲同騰訊（700）老闆馬化騰佔據，要講本港財經界第一代IT人，就非電盈（008）老闆李澤楷（小小超）莫屬。不過，呢期佢專心搞保險王國，搵來好友夏佳理、馬時亨分別做富衛集團主席同獨董後，噚日請埋CEO掌舵，可以開波大搞呢盤生意嘞。
小小超舊年完成收購並成立富衛，富衛噚日就委任越南籍嘅黃清風（Huynh Thanh Phong）做集團CEO。夏佳理同馬時亨係小小超好友，原來黃生都識咗小小超好幾年，算係friend底。

擅長睇東南亞業務

清風來頭唔細，以前係友邦（1299）三位區域首席執行官其中之一，專睇泰國、印尼、越南、印度同斯里蘭卡業務，舊年4月離開。再之前做過英國保誠同宏利，經驗豐富。
佢喺1992年就來港，斷斷續續在港居住12年，但由於工作上少管理香港業務，所以在港知名度較低。廣東話亦唔靈光，佢自嘲，所用嘅廣東話淨係夠打麻雀同埋搭的士用。
黃清風透露，識咗小小超幾年，大家有共同朋友，加上自己一直喺保險行業打滾，小小超又對亞洲保險業好有興趣，可以算係老朋友，但佢唔係因為大家老友先加盟㗎。
佢又伺機擦鞋，話見工時見到夏佳理同埋馬時亨，當時仲跟幾位管理層會面，發現集團管理層同董事局都好強，認為呢個係一個好好嘅發展機會，好難拒絕呢份工。
對於發展大計，佢話𠵱家富衛喺印尼賣保險已經唔使用筆同紙，基本上全部都可以用平板電腦搞掂，希望日後香港都朝呢個方向發展。

李華華
mailto:[email protected]