發展局局長林鄭月娥雖然好打得，但係全香港有咁多重建問題，令佢遇上唔少難纏對手，好似利東街May姐咁，喺舊年底絕食超過90小時抗議市建局拆樓，成功迫到林太走出辦公室見佢，雖然最後保唔住條街，但May姐鬥志不減，近排重出江湖，殺入深水埗撐K20至K23項目嘅街坊。
深水埗呢班街坊都係一等良民，唔係社運搞手，May姐即場傳授實戰經驗，包括點擺位影相，一旦有機會同林太見面唔使緊張，否則講嘢唔清晰就功虧一簣。

May姐上次絕食打動唔到市建局同林太，深水埗街坊吸取經驗，今次唔絕食，反而晚晚搞街坊夜宴，齊齊開飯show溫情，打算邀請林太一齊食餐飯，等局長feel吓乜嘢叫做街坊溫情，重建拆樓就鏟平呢啲生活，好可惜。
發展局方面話林太唔得閒食飯，但街坊向八方報料，指近日有民政事務總署人員夜訪重建區，左睇右睇連車房後巷都昅清楚，似乎係為高官落區踩線。林太好打得都始終要食飯嘅，八方建議林太搵日落區開餐，既可醫肚又可做多場走入群眾騷提高民望，點計都有賺。