聖誕快車開始前夕，唔少球評家都認為曼城嘅賽程只係對住般尼茅夫、紐卡素、水晶宮之流，應該相當「易食」；但似乎相關嘅連勝紀錄，讓曼城球員或多或少都飽受點壓力，加上連續兩場作客快車，令哥帥不得不作出輪換，故曼城失分已有先天性條件。綜觀全場曼城雖佔有超過七成控球率，傳球628腳成功率達87%，然而真正威脅水晶宮的攻門不多；最終連勝斷纜，筆者認為與鶴臣賽前嘅巧妙部署有莫大關係。

先講兩隊嘅排陣，主隊水晶宮面對攻力強勁嘅曼城，由4-3-3陣式改踢5-3-2，領隊鶴臣先用排陣說明，水晶宮今場以防守為主；而曼城由於連續兩場作客，結果哥帥讓阿古路和史達寧休息，只依靠大勇的奇雲迪布尼，搭檔加比爾捷西斯、利萊辛尼和今季無甚佳作的貝拿度施華攻堅。雖然排陣唔算話睇少對手，不過上述數人今季甚少一同上陣，或多或少會影響球隊嘅進攻流暢性。

而落到球場上，表面上排出5-3-2嘅水晶宮，其實係踢緊「901戰術」，水晶宮球員只要截到皮球，一係就大腳解圍，一係就長傳畀韋費特沙夏去追。最明顯一次係下半場67分鐘，當時水晶宮中場截到皮球，本可策動4打4嘅反擊機會，偏偏米利禾積域選擇將皮球大腳踢向前場，任由沙夏去追就算；表面上呢種踢法無疑係非常消極，但從戰術角度上，水晶官球員貫切戰術指令，不會因為有反擊機會而湧上前，以免自己失位。故曼城今場嘅短傳組織，根本無法撕破龜縮後場嘅水晶宮防線。

另一要讚嘅喺水晶宮球員今場嘅決心，兩閘雲安荷特和科素文沙一直保持專注，如上半場13分鐘科素文沙被利萊辛尼扭過後，仍能憑其速度體力回追對手，成功阻截曼城一次威脅反擊。雖然中堅大將史葛丹恩比賽中退下火線，但水晶宮球員未有因此自亂陣腳；當曼城換入史達寧加強球員互動走位，水晶宮球員仍能堅守崗位。其中86分鐘成功破壞曼城攻勢後，球迷嘅反應如同球隊入球一樣，全因是球員出色嘅防守表現，讓球迷看到了搶分希望，故球迷們亦作出回應，變相鼓勵了水晶宮球員「打老虎」嘅心態。

雖然曼城今場失分，但對佢地嘅爭標形勢似乎並未帶來太大影響，和波後或者能減低球員們嘅壓力，下場回到主場能夠盡情發揮。相比今場賽果，令曼城球迷最擔心嘅可謂核心迪布尼和前鋒捷西斯嘅傷出，已缺少大衛施華嘅中場線，假若迪布尼又要養傷，具創造性嘅中場恐只能派出根度簡搭檔耶耶托尼，或者曼城真正嘅考驗，由缺少迪布尼這一刻開始。