近排賽事，當你仍留意緊蔡約翰、羅富全、告東尼此類人氣倉口之同時，原來有位下游練馬師已靜靜起革命，所指正係身處榜末位置，暫時只得5場頭馬之告達理。

告達理上周六(23日)獨出一隻「包勝」，就真係馬如其名，一擊即中；而上星期三(20日)他同樣只派出一匹「大地和平」參戰，結果當晚力拚下僅輸給「春盈」短頭，賽後「大地和平」騎師田泰安以末段受干擾為理由，抗議「春盈」頭馬資格，雖然經研訊後裁定不成立，但見到「大地和平」搏晒老命雖敗猶榮之表現，已睇得出告達理決心急起直追，務求贏得幾多得幾多。

告達理近兩期日行一善出一駒，均交出非冠即亞成績，入Q率竟然達到百分之一百，認真估佢唔到。

今戰(27日)谷草夜馬告達理唔再玩單箭頭，加強兵力，共派出3駒「飛快叻」、「勁兔皇」、「靚跑得」應戰。其中第六場三班1000米之「靚跑得」在港4戰，頭3仗輸10.5至21馬位，上仗大幅窄至只負2.75馬位，進步明顯，今仗排6檔不差，隨時有更進一步演出。