港股昨日拉鋸，其實有暗湧，恒指喺200點內左搖右擺，大市成交雖然縮咗，但仲有接近274億元，唔算係淡靜嘅拉鋸，當中窩輪成交73.7億元，佔大市成交26.9%，金額及比例都比前日多咗。
大戶你推我撞，未分勝負，買恒指輪要睇定先，唔使急，在恒指下試支持位或上破17500關後再諗，值博率更高，況且𠵱家窩輪市唔算靜，可以搵嚟炒嘅窩輪仲好多。
過去兩日唔少專家話要睇實啲H股，H股指數喺50日線有好強支持，同𠵱家嘅指數好接近，留意炒H股，合理之至，吼番啲當炒嘅H股C輪，有得諗。

中石化C輪：中石化（386）近期好多新聞，好與壞睇你點睇，但睇遠啲，應該正面。股價昨收4.71元，升1.7%，洗淨前日高開低收嘅烏氣，仲見大盤埋位，股價暫時受制4.74元，若升破4.80元收市，升勢將不得了，有直撲5.20元嘅機會。中石化C輪4997，昨日報收42仙，升16%，仲有3個月命，溢價4%，槓桿率11.2倍（有效7.3倍），引伸波幅32.3%，大成交有鑊氣，正股升上5.20元，4997無理由低過70仙，現價買番啲，正股跌穿4.56元，沽出止蝕。
另一隻中石化C輪9395，輪價41仙，壽命長少少，可能略為影響輪價升跌嘅敏感度，但整體數據唔錯，都可以諗，現價買，睇68仙，止蝕參考同4997一樣。
俊樺