2003年沙士疫潮，令香港很多家庭支離破碎，孩童失去爸爸或媽媽，甚至雙親。香港演藝人協會有見及此，即發起舉行《1:99音樂會》。當年負責扯頭纜的，是時任演藝人協會會長梅艷芳，演出歌手包括四大天王：張學友、劉德華、黎明、郭富城，還有譚詠麟、鄭秀文、容祖兒等等等等。

音樂會於03年5月24日在大球場舉行，吸引26,000多名巿民入場，把只開三面看台的球場擠得密密麻麻。音樂會共籌到1,800萬，善款全捐給「茁壯行動」，幫助受疫情影響的孩童。

舉行前夕，即5月23日，世界衞生組織撤銷對香港的旅遊警告；音樂會舉行當天，不少動人場面，至今仍令人難忘。當時許志安向全場觀眾說：「香港人證明俾全世界人睇，我哋好團結，係最有愛心嘅地方。如果啲人問我係邊度人，我哋係香港人！」張學友唱歌期間，陳奕迅突然走出台前，宣佈喜訊：香港首次出現「零染感」，全場歡呼雷動。

事隔15年，一切仍歷歷在目。

但這個音樂會，缺少了哥哥——張國榮。然後，我們又失去了阿梅。

搞手之一劉天蘭接受《蘋果》電話訪問憶述：「記得嗰時哥哥（張國榮）啱啱過咗身，我哋去完悼念活動之後，阿梅請食飯，佢話要做啲嘢，發起咗呢個音樂會，當然係一呼百應。」

花了三個星期籌備，動員1,500位義工，《1:99音樂會》在十萬火急下舉行，劉天蘭表示：「全香港面對咁大疾病，氣氛好得人驚，街又冇人，我覺得演藝界呢次聚力量做1:99，大家好博命，擺低手頭工作，因為時間好短，籌組呢類活動唔係少嘢，無論行政、運作、捐款、牌照、稅務好多嘢搞，仲要創意。阿梅定咗呢個係音樂會，唔係普通柴娃娃，大家目的都係想幫助受沙士影響家庭嘅下一代，因為沙士帶走好多屋企經濟支柱，細路仔讀書都有問題。」

最後音樂會籌到1,800萬元，「茁壯行動」成立委員會管理善款。劉天蘭憶述：「成員包括我、會計師、律師等，大家定期開會批核款項，五年後善款用晒，任務完成，出咗一本小冊子，記得我去拜祭阿梅，燒埋俾佢：『我交功課畀你喇！』

「『茁壯行動』幫到好多小朋友，其中有個中學生印象比較深刻，佢本來準備去外國讀音樂，但爸爸因為沙士走咗，冇錢，佢屋企嚟申請，我哋批核咗，結果佢四年大學生活都係『茁壯行動』支持。讀完書返香港，佢彈古典結他好叻，我哋委員會有個會計師係基督徒，搵呢個學生喺活動表演，我覺得幾好呀，供書教學幫助佢哋。」

其實當時阿梅已患了子宮頸癌，仍強撐帶領全港歌手為沙士籌款，劉天蘭感慨萬千：「嗰陣佢已經病緊，佢好堅強。阿梅吹雞，佢係好有獨特做領袖嘅力量，對周邊人有影響力，大家晚晚6點開會，通宵做嘢，佢嗰時已經好唔舒服，有一兩次嚟唔到，我哋話番俾佢知。

「佢意志力真係好超人！當年阿梅出殯時，一批沙士受惠家庭嚟鞠躬，我睇到好感動。」劉天蘭說。

《蘋果》沙士15周年系列網站，正式登場：
https://hk.feature.appledaily.com/sars15/