為了避免獨居長者在家中跣倒受傷，鄰舍輔導會馬鞍山康齡中心獲蘋果基金資助舉辦「長者家中裝扶手，安全生活冇甩拖」計劃，安排義工上門替約一百四十戶安裝廁所扶手。日前該中心職員與四名義工，帶備安裝工具及材料，上門替兩位獨居長者安裝扶手，助其出入。

「腰骨痛咗幾十年，有時痛到行唔到，坐喺廁所耐咗，起身嘅時候都好辛苦，惟有扶住個窗口借力慢慢起身。𠵱家有咁多義工嚟幫我安裝扶手，梗係開心啦，以後可以用扶手借力，慢慢行出廳。」六十八歲獨居的唐婆婆喜孜孜地說。
唐婆婆的丈夫因病去世十多年，育有一名女兒，已成家立室。她曾當車衣、電子廠工人及雜工，九八年不幸罹患輸卵管癌，遂辭退工作，依靠綜援金維生。曾先後接受六次化療，目前癌病已康復。
患有高血壓的她表示，約六年前入住長者住屋，惟坐廁旁沒有安裝扶手，為免因地下濕滑跣倒，故出入要份外小心。現她喜獲義工免費上門替其安裝扶手，減輕經濟負擔。
另一位受惠的孤寡長者八十一歲的劉婆婆，丈夫五年前因病去世，膝下無兒女。早前從事紗廠行業，退休多年，現依靠綜援金維生，經濟緊絀。
「以前開工嘅時候，唔小心跌倒，𠵱家對腳成日冇力行路，沖完涼都冇力起身，咪扶住洗手盆行出嚟，但又好驚個洗手盆唔穩陣會跌落嚟。好彩𠵱家有個扶手用，方便好多。」白髮蒼蒼的劉婆婆由衷地道。