華置（127）大股東劉鑾雄（大劉）新任太太陳凱韻（甘比）今年初加入董事局後，噚日首次有股東會，可惜，無論係大劉、佢長子兼非執行主席劉鳴煒或者甘比都no show，只得甘比家姐兼華置行政總裁陳詩韻，同執董妹妹陳諾韻撐場。
股東會約有50名小股東參加，多數係公公婆婆，個別喺開會前傾偈，竟然好似討論大台長篇電視劇咁，一齊討論大劉同甘比係咪真愛，唔少支持大劉娶甘比，又話大劉始終係公司幕後揸弗人云云，相當八卦。
不過，呢次股東會主要要求小股東投票通過，畀華置出售資產畀甘比，有小股東喺會後急不及待上前向陳詩韻追問賣產後，公司如何維持經營，華華聽到陳詩韻都答得有紋有路，好熟書，冇話左閃右避，仲話公司一直都有物色海外收租業務，以高回報為首要條件咁話。

部份小股東擔心，華置以後無法繼續派高息，個別又因見唔到Package劉而感到失望，但佢哋都堅持死心塌地唔會沽華置股票。
同場加映，大家都知甘比最愛一隻企鵝卡通Pingu，Pingu仲有個妹妹叫Pinga，噚日陳詩韻、陳諾韻兩姊妹就係坐住「P1NGA」車牌嘅私家車到場㗎喇。

李華華
mailto:[email protected]