傅穎（Theresa）以「纖形22」新代言人身份，噚日喺天水圍出席「妙極MegaDANCE」活動，佢仲示範跳舞瘦身大法，吸引唔少市民圍觀，因為個活動喺商場度舉行，有唔少男士由二樓望落嚟，Theresa話佢做足防走光措施，打咗三層底，包冇走光。
呢間纖體公司之前係由徐子珊任代言人，有人話Theresa取代咗子珊，Theresa澄清話：「唔係，大家跳嘅舞蹈都唔同，冇話邊個取代邊個嘅，我簽咗一年合約，酬勞OK，幾滿意㗎。」。Theresa又話：「22係我lucky號碼，9月22日又係我生日，呢個代言人好啱我做。」

跳舞減壓

講到跳舞減肥，Theresa賣花讚花香話覺得真係好有效，仲可以減壓㖭！有記者笑佢可以介紹畀隊友鄧麗欣，因為佢都需要減壓？Theresa笑笑口咁講：「公司同事唔使減壓，應該係啲男同事要瘦身，佢哋好多個都有大肚腩。」
早前薛凱琪出席商場活動，俾人用膠樽掟中頭受傷，Theresa講笑咁講，話佢唔擔心發生喺自己身上，因為佢會跳住舞閃開。馮仁昭奉勸都係要小心啲好，意外嘅嘢有時好難避免。