「惡女人」大戰葉劉淑儀 - 李八方

蘋果日報 2002/07/12 00:00


吳靄儀(圖)、余若薇、何秀蘭、劉慧卿「四個癡心惡女人」真係同情心爆棚,噚日立法會二讀反恐條例草案,訂明會凍結、充公恐怖分子財產,班女人擔心恐怖分子都有兒有女,萬一係冤案,連食飯、上訴都冇錢。吳靄儀於是提修訂確保受影響嘅人夠錢應付基本開支同法律訴訟。
雖然葉劉淑儀都係女人,但就肯定唔心軟,佢一聽吳靄儀嘅修訂即刻彈起,大大聲話:「恐怖分子係大壞蛋」,又提出如果個恐怖分子係回教徒,話自己有四個老婆四十個仔女要供養,又或者好似拉登咁面色蒼白成日病,凍結佢一千萬,轉頭開張醫療費單,要攞番九百萬點算!葉劉真係愈戰愈勇,不過咁講嘢唔知啲回教徒會唔會抗議佢歧視。
吳靄儀一於少理,不停出賣余若薇,一陣用余若薇做人版,解釋如果余若薇被指係恐怖分子,自己就連買個飯盒畀佢都犯法,一陣又話雖然恐怖分子係壞蛋,但大家眼中嘅拉登都可能認錯人,可能只係余若薇着錯衫。


傳真︰2623-9278
電郵︰[email protected]