狂牛西班牙兩戰皆北，今屆世界盃提早畢業，由天堂跌落地獄，感覺當然難受。以往瘋狂短傳嘅踢法，因球員老退而失效，情況好似之前科網股咁，越高PE炒得越甘，如今卻成為洗倉藉口。球隊踢法難一時三刻改變，但炒股卻可靈活走位，學曹Sir曹仁超話齋，最重要係個「勢」。
早年兩次提出私有化嘅王氏港建（532），噚日突然炒高9%，現時公司市值僅5億銀，PB卻只得0.38倍，又係另一隻賣殼好材料，圖表已出現突破，短炒目標睇0.9元。除咗殼股外，近排唔少公司都搞分拆，務求將價值全線釋放，佳寧娜（126）年初曾發出通告，表示有意將物業投資或餐飲酒店業務是但一瓣上市，適逢公司下周放榜，話唔定會一併公佈好消息，買定有着數。

業績靚仔　憧憬分拆

睇番佳寧娜盤數，一啲都唔失禮，中期多賺68%之餘，金額更已相當於上年度嘅97%，全年業績肯定有睇頭；PB卻低得可憐至0.5倍，相當於半價大平賣，加上有淨現金揸手，絕對係可造之材。佳寧娜公佈擬分拆消息後，單日曾炒高逾兩成至2.1元，現價1.6元，竟較消息公佈前還要平一截，點秤都值博。
世界盃去到打崩頭階段，法國今晚會迎戰瑞士，前者頭場打出信心，後者表現卻未如預期般強，法國主客和主勝有1.73倍，買得過！另前鋒賓施馬fit到爆燈，博佢今場有兩球（7.5倍）及三球或以上（25倍）士哥。

唐牛
https://www.facebook.com/tongcow88