因為做巡迴演唱會嘅關係，周柏豪有一段時間冇喺香港露面，不過今日佢現身尖沙嘴海港城，為Moncler Fragment聯名系列示範全新服飾，柏豪原本向劇組請假一星期，為周六假東莞舉行演唱會作準備，但因為之前欠下不少廣告代言工作，所以其中六天都需要還工作債。

之前曾表示為演唱會準備最辛苦一環是戒口，柏豪透露今次戒口非常成功，功臣當然係老婆，柏豪話：「可能人大咗鍾意食得清淡啲，真係喺屋企兩個人食咸魚白菜都好好味。」他又讚老婆遺傳咗外母精湛廚藝：「佢每次睇完菜譜，就好有天份咁去調味同煮，次次都好食，我唔駛做白老鼠，最近仲整慢煮三文魚，又拎支火槍燒吓三文魚嗰面，我一聞到香味就起身食，又會用六個鐘煮豉油雞。」

柏豪自爆細個成日整煎蛋煎午餐肉俾阿哥食，嗰陣以為自己廚藝了得，想立志做廚師，點知大個咗之後先知自己只懂一二，唔知佢會唔會打本俾老婆開私房菜？佢話：「唔會啦，唔想佢哋太辛苦，佢哋都好低調。」至於怎樣報答老婆，柏豪笑指已經喺新樓寫咗老婆個名。

精選娛聞，喺晒《娛果》
http://fb.com/appledailyent