自從喺英超畀曼城同熱刺技術性擊敗之後，利物浦就開始「原力覺醒」，歐聯分組賽首名出線之餘，近六場英超更取得五勝一和，不知不覺已爬升至聯賽第四。但利物浦的後防似乎有點單薄，常規中堅只得祖爾麥迪比、卡拉雲以及洛夫雲，不過名宿希比亞就對紅軍好有信心，話球隊一月唔使買人！

希比亞好滿意紅軍嘅近況，仲話球隊依家運作得好好，喺一月唔使買人：「喺呢個moment，我覺得（紅軍）冇咩方面要再進步。我哋依家唔單止贏緊波，仲係咁入波，而且仲可以保持不失，依家一切都好正常。如果用1000萬鎊買個球員返嚟，但發現佢原來唔啱使，咁樣係唔合理。」

但對於紅軍攞英超嘅機會，希比亞就唔樂觀:「(紅軍)今季要贏將會係非常、非常困難，因為我哋已經大輻落後曼城，同埋佢哋差唔多每個禮拜都攞到分。但最低限度今年要攞到前四拎歐聯資格，如果贏埋歐聯就最好!」

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM