2007年港姐季軍兼「魅力美腿大獎」周美欣（Lori），最近投身樂壇做歌手，其實佢選美之前，已經喺「新秀歌唱大賽溫哥華選拔賽」冠軍級人馬，歌唱實力不容置疑，加上五呎九吋身高嘅佢擁有43吋長腿，睇得又聽得。日前Lori穿短裙騷美腿，為處女作《不失禮》喺夜店拍MV，佢話場景勾起佢讀大學時失戀傷心片段。

Lori話：「《不失禮》係我第一首主打歌，以前拍人哋嘅MV就拍得多，今次終於做自己既主角，心情興奮又緊張。好多公司同事到場打氣，令我好感動。」

MV內失戀Lori找好姊妹開解，兩杯到肚心情轉好，三位靚女率領全場又唱又跳，勁high！她說：「導演知我第一次拍MV會緊張，所以安排有劇情嘅故事，令我容易啲投入，而且感覺就好似我鍾意睇嗰種美式劇既風格，仲有兩位飾演我好姊妹既dancers帶我入戲，所以拍攝過程好順利！」

原來MV中失戀故事，勾起Lori傷心回憶，佢話： 「之前我冇同導演講過自己故事，但今日嚟到一路拍，就令我諗返好多讀大學時既回憶，記得有一次我失戀得好傷心，幾個女仔朋友陪我去飲嘢散心，結果大家好開心咁跳舞，心情都好返晒！(借酒澆愁?)我唔好酒精，今日亦都冇飲酒。」