民主黨入面有個相當「另類」嘅黨員陳莊勤，過去八、九年成日發表好多似建制多過似民主派嘅言論，原來民主黨舊年決定革除佢黨籍，而佢就先發制人先行退黨，原本單嘢其實冇乜好講，但經常擦存在感嘅前特首梁振英忽然叉隻腳落去，大鬧民主黨「以言入罪」，仲引用陳嘅一句話：「那麼民主黨與共產黨有甚麼分別？」有民主黨人睇見即時笑到收唔到聲，話身為全國政協副主席嘅689係咪想鬧中共都係「以言入罪」先？

陳莊勤喺《亞洲週刊》撰文，透露佢上年9月已退出民主黨，因舊年佢就7.1衝擊立會一事發表文章，批評民主派政黨包庇暴力，結果俾民主黨人投訴文章有損黨聲譽，交畀紀委處理，陳喺文章入面鬧民主黨要嘅係「統一思想」。

藉陳莊勤退出民主黨借題發揮

689噚日立即喺fb發文撐陳莊勤，大鬧民主黨唔民主、以言入罪之類，最好笑係成篇嘢第一句就用咗陳莊勤嗰句，「那麼民主黨與共產黨有甚麼分別？」，有民主黨人同八方講，689唔會睇唔明句嘢意思，係陳想話民主黨衰過共產黨，即係話陳都覺得中共好衰，689引用呢句，係咪都認同中共好衰先？唔通689想加入反共陣營？

至於民主黨係咪衰過中共？民主黨人同八方講，只要Google吓陳莊勤過去七、八年發表嘅文章，佢拎住民主黨創黨成員個牌頭，由2012年佢插反國教運動開始，到佔中、反送中，佢一直寫文插民主派，民主派、市民叫689下台，佢又寫文捧689，完全同民主派立場唔同，民主黨忍咗咁耐，到今日先革佢出黨，叫做仁至義盡。其實佢同建制立場咁似，不如直接入建制，何必拎住民主黨創黨成員個名咁難為？

李八方