當年今日
關於我們

【豪華婚禮】拳王拳后結婚使80萬 打多場先度蜜月

蘋果日報 2018/09/28 00:01

結婚生仔泰拳珍寶珠金腰帶胡凱欣陳啟迪最年輕女拳王無比迪

香港最年輕女拳王胡凱欣下禮拜一下嫁拳王陳啟迪喇!
胡凱欣綽號珍寶珠,年紀輕輕就已經7奪金腰帶,轟動拳壇,佢仲手持1面東亞泰拳錦標賽金牌以及亞沙運1銀1銅!得21歲嘅小妮子,做任何事都快人一步,包括人生大事。10月1號,珍寶珠就升呢做人妻,下嫁香港著名泰拳選手陳啟迪。
結婚,一生人得一次。為咗摯愛,梗係要豪盡佢啦!陳啟迪笑言,「我哋埋單總數都大約7字頭!」珍寶珠補充,「係80萬呀!」陳啟迪即刻叫佢細聲啲!查實淨係睇過大禮張相,就知排場十足,婚紗相除咗喺香港拳館影一輯,仲飛去希臘影添!問到珍寶珠點解咁快有結婚嘅念頭,佢甜絲絲咁話,「拍幾耐都係佢嘅話,我覺得幾時都okay,最緊要佢唔反對我打拳!」愛得早,不如愛得剛剛好,最重要嘅都係身邊呢個同路人。
常言道,每個成功男人背後,都有強大女人係背後默默支持,反之亦然。珍寶珠講返同陳啟迪嘅相處點滴,「有一場佢摑醒我,真係摑落嚟,都幾窩心嘅...」被人摑都覺得窩心?聽落好奇怪,但係原來係珍寶珠同陳啟迪要求,如果自己係擂台上呆呆滯滯,唔清醒,無論鬧佢摑佢都絕對唔會發脾氣,「但係返落台就唔可以咁做!」。無論珍寶珠被打到口腫面腫,滿身傷痕,陳啟迪亦從不嫌棄,兩個人一齊追夢。
一步一同行,除咗係工作上互相扶持,係婚姻上都目標一致,比賽生B都重要,陳啟迪坦言唔會刻意避孕,「雖然話結咗婚之後退休,不過如果遇到好值得挑戰嘅對手,或者好值得參加嘅賽事,我哋可能都會抵唔住頸,忍唔住就會復出!」能夠做到自己鍾意嘅事,身邊又有最愛嘅人支持,幸福就係如此簡單。
在此祝福佢地,快啲生返個一拳寶寶!
場地提供:富德拳館、希臘女神婚紗攝影
記者:Natalie
攝影:峰
後期:Roy
編審:阿仙
--------------------
荷蘭殺神[紅SP]戴維斯參戰確定!立即下載 BFB CHAMPIONS 2.0,建立你的橙衫軍! http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports
empty
珍寶珠同陳啟迪10月1號就會拉埋天窗啦!
empty
珍寶珠對泰拳有份堅持同執著,就算打到頭破血流、毀容都唔怕!(受訪者提供)
empty
人生在世,都係想搵返個同路人互相扶持,一齊為夢想奮鬥。
empty
早已視泰拳為終生事業嘅珍寶珠揚言,婚後生B都會繼續打!
empty
拳王拳后結婚,梗係要豪盡佢,過大禮都排場十足!(受訪者提供)