今日喺中環舉行一個首飾品牌活動，低胸上陣嘅林芊妤（Coffee）被問到男友平日會唔會送啲首飾做禮物，佢話：「我男友冇可能會買呢啲嘢，成日送俾我都係啲藍芽耳機、iPad、相機嗰啲好實際。」講到今日係白色情人節，Coffee話：「其實次次我都有同佢講，佢就話『Again？』其實男友都唔識呢啲嘢，我都係同佢講笑，自己都冇準備禮物，趁佢唔知就慳番啦！」

忙於教瑜伽嘅Coffee話預計今年出本減肥書，不過由於發生咗「難以預計嘅事」，所以要順延，問到佢「難以預計」嘅事係咪有喜？Coffee即否認：「唔係，本來想書展出，但o依家要順延。」問到佢係咪因為要結婚？Coffee甜笑住答：「可能係，亦可能閃婚㖭！講笑啫，其實真係冇plan過。不過書嗰度因為真係太忙，又要搞屋企啲嘢，驚出唔切，自己又啱啱整親隻腳，所以就順延囉。」

另外，拍酒店搜尋網站廣告嘅黎學勤就話呢排出席活動多咗：「因為做咗ViuTV個節目多咗人識，我同Louis（節目拍檔）都好開心。」問到會唔會添食？黎學勤話：「都要睇ViuTV，不過我哋估如果添食都會去熱嘅地方，因為今次去咗最凍嘅地方。」講到去熱嘅地方，可能要除衫騷肌，黎學勤話：「都要頂硬上喇，所以要操弗啲，嚟緊都要去馬來西亞拍廣告。自己都想拍劇，早排幫港台拍咗個關於陳百強嘅節目，要演一啲關於陳百強嘅歌入面啲故事。」佢仲話自己好鍾意做戲，有跟彭秀慧導演學戲，又有喺大陸拍過啲古裝電影。

精選娛聞，喺晒《娛果》
http://fb.com/appledailyent