國泰早前公佈金融海嘯後首份「見紅」業績,仲話要展開3年計劃,削減燃油以外嘅開支。CEO行政總裁朱國樑喺業績會,既拒絕評論係咪會搵中低層員工「開刀」,亦唔回應管理層會否減人工,同公司一齊共度時艱,仲係話自己舊年都冇加人工咁話。
點知睇番國泰噚日公佈最新年報,朱國樑2016年確實冇加薪,仲比2015年減咗25.3萬元,舊年基本薪金320萬元。之但係,國泰雖則蝕錢,但佢袋落袋嘅花紅就增加咗三成幾,計埋津貼及福利、退休供款計劃後,薪酬總額為1,050.7萬元,比2015年多近40萬元。
其餘4位常務董事,不論基本薪金定花紅,亦齊齊加碼,常務總裁何杲(Rupert Hogg)繼續成為國泰最搵得管理層,舊年薪酬總額為1,201.4萬元。