「子華神」黃子華棟篤騷掀起全城撲飛熱，好友佘詩曼今晚到銅鑼灣出席時裝活動，被問到有冇撲子華騷飛？阿佘鬼馬表示：「我好幸運，唔使撲，有一張飛，因為喺佢宣傳開騷之前，我已經知道消息，之後我問子華可唔可以再加飛？佢話：『諗都唔好諗，唔好痴心妄想，係冇嘅。』」

阿佘話基本上每日都有人問佢想買黃子華嘅飛，直至17號知道子華宣佈「金盆o浪口」：「我直情將手機較靜音，有成50個message搵我撲飛。」問到佢點推人？阿佘抵死話：「我求佢加一場解決我嘅問題，相信都唔止我一個，我諗棟篤嘅監製都同我有同一遭遇，但都戥佢開心，有咁多人支持佢睇佢個騷。」至於子華神宣佈做完收咪，係咪覺得好可惜？阿佘話：「點會唔捨得，佢諗咗好耐嘅決定，佢開心就得，佢又唔係退休，可能會做第二樣嘢啫。」

另外，阿佘話自己啱啱放完短假，好似甜品一樣，長假就冇嘞：「自己計劃咗5年放長假，都唔能夠夢想成真，我好想放3個月大假去環遊世界，可能要等退休，今日睇新聞有對情侶買遊艇環遊世界，好羨慕。」大家笑佢都要搵個男人先得，阿佘信心十足話：「得啦，搵緊啦，緣份天注定，有㗎啦，樂觀啲。」

精選娛聞，喺晒《娛果》
http://fb.com/appledailyent